Smt Nandini Satapathy

ଅଭିନନ୍ଦନ ଓ ଶୁଭେଚ୍ଛା

ମନୋଜ ବାବୁଙ୍କ ସମ୍ପର୍କରେ ସ୍ବାଗତ ଗ୍ରନ୍ଥରେ କିଛି ଲେଖିବା ପାଇଁ ମୋତେ କହିଛନ୍ତି୤ ମନୋଜ ବାବୁ କଟକରେ ପାଠ ପଢ଼ୁଥିବା ବେଳୁ ତାଙ୍କୁ ମୁଁ ଜାଣିଛି୤ ତାଙ୍କ ସହିତ ମୋର ଭାଇ ଭଉଣୀ ସମ୍ପର୍କ୤ ମୁଁ ତାଙ୍କର ଅପା ଏବଂ ସେ ମୋର ମନୋଜ୤ ବୋଧହୁଏ ତାଙ୍କର ପ୍ରଥମ ବହି ‘ସମୁଦ୍ରର କ୍ଷୁଧା’ ମୁଁ ପଢ଼ିଥିଲି୤ ତାହା ମୋତେ ଏପରି ଭଲ ଲାଗିଲା ଯେ, ମୋ ବାପା (ସ୍ବର୍ଗତ) କାଳିନ୍ଦୀ ଚରଣ ପାଣିଗ୍ରାହୀଙ୍କୁ ତାହା ନେଇ ଦେଖାଇଲି ଏବଂ ସେ ମଧ୍ୟ ତାହା ପଢି ଖୁବ୍ ଆନନ୍ଦିତ ହୋଇ ଲେଖକଙ୍କୁ ଆମ ଘରକୁ ଡ଼ାକିବାକୁ କହିଲେ୤ ମନୋଜ ବାବୁ ବହୁବାର ଆମ ଘରକୁ ଆସିଛନ୍ତି ଏବଂ କାଳିନ୍ଦୀ ବାବୁଙ୍କଠାରୁ ଆଶୀର୍ବାଦ ନେଇଛନ୍ତି, ପ୍ରଶଂସା ଶୁଣିଛନ୍ତି୤

ତା’ପରଠାରୁ ଆଜି ପର୍ଯ୍ୟନ୍ତ ମନୋଜ ବାବୁଙ୍କ ଲେଖା ଅବ୍ୟାହତ ରହିଛି୤ ବହୁ ଗଳ୍ପ, ଉପନ୍ୟାସ, କବିତା ତଥା ସ୍ତମ୍ଭ ଲେଖା ତାଙ୍କର ପ୍ରକାଶିତ ହୋଇଛି୤ କେତୋଟି ବହି ମଧ୍ୟ ଇଂରାଜୀରେ ବାହାରିଛି୤ ବହୁ ସମ୍ମାନର ସେ ଅଧିକାରୀ ହୋଇଛନ୍ତି୤ ଆଜି ପୁଣି ବାଲେଶ୍ବରବାସୀଙ୍କ ଦ୍ବାରା ଅଭିନନ୍ଦିତ ହେବାକୁ ଯାଉଛନ୍ତି୤ ଏହି ଅବସରରେ ମୁଁ ତାଙ୍କ କୃତି ବିଷୟରେ ଅଧିକ କ’ଣ ଲେଖିବି ? ପ୍ରାୟ ସବୁ ବହି ତାଙ୍କର ମୁଁ ପଢ଼ିଛି୤ ଅବଶ୍ୟ ଅବସ୍ଥା ଅନୁସାରେ ତାଙ୍କର ଲେଖାର ଢ଼ଙ୍ଗ ମଧ୍ୟ ବଦଳିଯାଇଛି୤ ପଣ୍ଡିଚେରୀ ଗଲାପରେ ଯାହା ସବୁ ଲେଖିଚନ୍ତି ଓ ଲେଖୁଛନ୍ତି ସେ ସବୁର ଏକ ଅନ୍ତର୍ନିହିତ ଉଚ୍ଚ ମାର୍ଗର ଦର୍ଶନ ରହିଛି୤ ସବୁ ଲୋକ୍ ହୁଏତ ତାଙ୍କ ଲେଖା ବୁଝି ନ ପାରନ୍ତି, କିନ୍ତୁ ଯେଉଁମାନେ କିଛି ମାତ୍ରାରେ ତାଙ୍କ ସ୍ତରକୁ ଯିବାକୁ ଚେଷ୍ଟା କରୁଛନ୍ତି ସେମାନେ ବୁଝିପାରିବେ ୤ ମୁଁ ଆଶା କରୁଛି ଆପଣଙ୍କର ଏହି ଅଭିନନ୍ଦନ ଗ୍ରନ୍ଥ ମନୋଜଙ୍କର କୃତି ସମ୍ପର୍କରେ ସମୃଦ୍ଧ ହୋଇ ଓଡ଼ିଶାର ପାଠକ, ପାଠିକାଙ୍କୁ ଆନନ୍ଦ ଦେବ୤ ଆପଣମାନଙ୍କ ସହିତ ଏହି ଅବସରରେ ମୁଁ ମଧ୍ୟ ମନୋଜଙ୍କୁ ମୋର ଅଭିନନ୍ଦନ ଓ ଶୁଭେଚ୍ଛା ଜଣାଉଛି ୤

ସୌଜନ୍ୟ: “ ମନୋଜାୟନ”